---

bitte nur bewerben, wenn du dich mit dem Text identifizieren kannst

---

(bitte Bezug nehmen auf meinen Text)

Ich beschriebe jetzt mal mich und min Lebensstil und falls das au uf dich zuetrifft, freu ich mich uf dini Bewerbig :-)

Ich bin 43gi, Schwiizerin, aber sehr weltoffe durch mini ville Reise und dadurch, dass ich für fast 3 Jahr in Südafrika glebt han. I de letste Jahre han ich min Bsitz um einiges reduziert und versueche relativ minimalistisch z'lebe. Wasi vill han, sind Pflanzene ;-) ich liebes neui Pflänzli sälber zieh und sDihai z'begrüänä. In mitte vo dä Stadt läbä, zentral si und vill Abentür-Möglichkeite z'ha, find ich genial. Glichziitig lieb ichs, dass mer bi mir dihai vo dä Natur umgäh isch und mer nöch bim Üetliberg sind.
Wie chönti en Tag vo mir usgseh? under dä Wuche stahn ich relativ früäh uf, räuchere mal chli Palo Santo oder Sage, stelle Musig ha (normali Luutstärki - nöd party vibes ;-) ) und mache Sport oder meditiere. Entweder gahn ich dänn is Büro go schaffe oder han Home Office. Meistens bin ich im Home Office und schaffe i dä Kuchi oder ufem Balkon. 1-2x pro Wuche chunt en guete Fründ verbi, damit mer zämä Home Office chönd mache.
Mis Naturelle isch abentürlustig, unterhemenslustig und projektle ;-) vill Fründe nänned mich "the busy bee", wo au min Spitzname Claudiathebee herchunt. Ich bin - wie anderi amal sägäd - schnell i Handlige und liebe Veränderige. Es chan immer alles anderst cho und ich liebe das ;-) ich bin aber au sehr ruhig und bruche vill Me-Time <3 ... das heisst, es chan au vorcho, dass ich hei chume und eifach nur "hoi" sägä und dänn is Zimmer gah go chille ;-) ... ich finds schön, wänn mer dihai au mal chan im Stille näbed enand was choche und amene andere Tag sind mer am pläuderle ;-) es chan alles vorcho.
Was mach ich so i minere Freizeit? ... vo Natur über Psy-Festival bis hin zu spirituelle Zeremonie .... ich liebe Sport und Energiearbeit. Ich han au immer wider mal Gäst, aber wie gseit, ich bruche au Me-Time ;-) … zwüsched dure mal en Prosecco mit Fründe lit natürlich au drin 😉 Mis Lebe isch e gueti Abwechslig zwüsche Abentür und Verantwortig im Job. Ich bin Projektleiterin i dä Digitale Transformation (imene soziale grössere Betrieb) und näbedbi unterricht ich Dütsch a dä Hallo Deutschschule. Zwüsched dure tuen ich no Start-Ups i dä Unternehmerstratgie oder Brand Identity unterstütze.
Was sind mini values? Freiheit, Ehrlichkeit und Eigeverantwortig.
Leider bin ich no Raucher (natürlich nur ufem Balkon), aber das Projekt mit Nichtraucher-werde gahn ich bald mal a – chan aber nüd verspreche ;-)

Ich wünsche mir es WG-Gspändli (ab 35gi), wo mit beidne Bei im Läbä staht, ordentlich und suber isch, sowie abentürlustig und reisefreudig isch. E Person wo au elektronischi Musig liebt (best case: au no Psy, aber das isch nöd jedermanns ding ;-) ) ... oder eifach Gitarre-Jams, schamanischi Musig, etc.
Mir würed zämä luege wie mer das mitem Putze mached. Ich hans gern ufgruumt und suber, bin aber Putz-fuul und darum isch mini Wohnig mitunter minimalistisch igrichtet. Je weniger umestaht - desto eifacher zum putze ;-) drum wür ich gern sBad, dKuchi und dä Igang so lah wies isch und nöd no meh Sache herestelle. Es hät aber gnueg Ibauschränk.
Und wänn du au interessiert bisch a Meditatione oder ähnliches, dänn um so besser ;-)
Ich bin en sehr offene Mänsch und wünsche mir es WG-Gspändli, wo möcht inere WG wohne, will mer WOTT inere WG wohne (nöd nur us Geld-Zweck). Mini Zimmertüür isch immer offe, sogar i dä Nacht, wänni am schlafe bin. Das zum Zeige wie offe ich bin. Es söll es gmeinsams Dihai si, wo sich beid mitenand, aber au individuell und ellaige wohlfühled, sich gägäsitigi vertraued.

Dä Balkon isch i mim Zimmer, aber mini Türe isch eigentlich meistens offe und mer chan dädur laufe und selbstverständlich chasch du dä au nutze. Da dä Balkon aber i mim Zimmer isch, zahl ich es bizeli meh ad Mieti. De Rest wird fair ufteilt.

Dis Zimmer wär sehr hell und isch 14.3m2 gross.
Es isch das, wo momentan vill Möbel und dä Kuh-Teppich drin isch. S'Zimmer wird leer und putzt übergeh.
Izieh chöntisch du per sofort.

Freu mich druf, vo dir zerfahre, was dini Bedürfnis im Zämäwohne sind und wie din Lebensalltag so usgseht.

Ich wirde nur ca. 4-5 Lüüt ilade fürd Besichtigung bzw. fürs Kennelerne. Ich finds wichtig, dass mer eus es Stündli chönd unterhalte zum gspüre, öb mer eus verstönd und möged ;-)

Anforderungen:
Unterzeichnung Untermietvertrag
Kopie Pass
Vorweisung einer Haftpflichtversicherung
Beteiligung an allen Nebenkosten
Wir haben keine Putzfrau und machen das selbst
Miete, inkl. NK, muss bis zum 27. vom Monat auf meinem Konto sein