Hallo zemme :)

Ich sueche lüüt im Alter vo 20-30 wo lust hend teil vonere Permakultur WG sii.
Ich han s grosse Glück und Privileg, dass ich is alte Huus vo mine Grosseltern derf izieh!
Es wahrhaftig mega schöns Grundstück mit sehr viel Platz dusse und dine. Ich bin zurziit e Usbildig zur Permakultur Praktikern und Designerin am mache und han die toll Chance becho, das Land als mis erste Projekt derfe zbenutze woni jetzt Stück um Stück am designe bin und denn hoffentlich in Ziite au umsetze derf.
Durch das suech ich Lüüt wo gern Zit dusse ide Natur verbringed und au en nachhaltigere Lebensstil lebed oder wend lebe. Ich wür sehr gern Mitbewohnis ha wo sich freued au amal im Garte mitzhelfe und mit dene ich denn natürlich au t froid vode Ernte derf teile. Grundsätzlich isch mer wichtig, dass t Menschen wo da iziehnd s Bedürfniss nachere Gemeinschaft hend und sich au Ziit wend neh zum die ufbaue und zpflege. S huus bütet au de Platz zum sich kreativ uszlebe also fendis schön mit Mensche zemme zwohne wo das au schetzed und gern wend nutze. S Huus het Platz für 6 Lüüt aber für de Anfang werdemer mal zvierte det ine derfe wohne.

Nochli zu mir: Ich bin 24gi und bin wie scho gseit a dere Permakultur Usbildig am Auenhof in Feldbach dra und es macht mir au würklich spass (de prozess zum was finde wo stimmt isch chli en struggle gsi). I minere Freizit bini gern dusse im garte (shocker), am Wildkrüterli sammle, journale, tagträume, mit friends reflektiere, philosophiere und zit verbringe, creativi projects mache (filmli, Tone, Schribe, Male, Spiele, Nähe..), Brot bache und apparently hani jetzt au agfange sport mache und ztanze. Das wer mal so en Anfang aber chend aus ja denn gern no besser persönlich kennelerne.

Ich froi mich eu derfe kennezlerne und fends schön wenner im Ustusch mir chend verzelle wie ihr eu es gemeinsames Zemmelebe vorstelled und wie ihr das au gern würed pflege. Verzelled mir au gern was eue Bezug zur Permakultur isch und ob ihr au scho Erfahrig im Garte gmacht hend (bin selber no en newby:)).

PS: bin jenachdem au flexibel mit de Izugsdate, ich weiss es wer scho bald.

okay take care und freu mich vo eu zghöre!
e grossi umarmig,
Lucy