"Miau Miau"

I bi z Meiti, di offizielli Diva vo dere WG. I läbe hie i mim fluschige Riich mit zwöi mönschliche Diener – äh, i meine natürlech Mitbewohner – wo zuefällig Brüetsche si. Aber ke Sorg, i ha se guet im Griff. ;-)

Gnue vo mir und itz zu dir:
Bisch parat, ines Abentüür z'springe, wo ig, z kuschelige und härzige Chätzli dis tägliche Läbe wirde berichere? I sueche nämlech e neue Ungertan – eh, i meine natürlech Mitbewohner – wo versteit, dass d Sunneplätz im Huus mir ghöre und dass d'Kunst vom Buchchräbeli heilig isch und du dir das zersch muesch verdiene.

Die 2 Brüetsche si sehr agnehmi, hei sech aber glich es paar Gedanke gmacht, das ig im Rund-um-Sorglos-Päckli cha witerläbe:


*
Tierliebi isch es Muss:
I akzeptiere nur Bewärbendi, wo mini "Exzellenz" z'schätze wüsse und parat si, mir Tribut i Form vo Läckerlis und Kompliment z schenke.
*
Ordnigsliebi isch verhandelbar:
Ig seuber hingerlah ab und zue es paar Haar ir Wohnig. We du ou e chli chaotisch bisch, finge mir sicher ä Wäg zäme i dene 4 Wäng z wohne. Aber d Brüetsche bestöh scho ufene gwüssi Grundornig.
*
Abentüürlustig?
Perfekt! Obschon ig mini Täg mittlerwile lieber ruhig verbringe, beobachte i gärn Vögeli und gniesses fest we i gstrichelet wirde. Es louft ömu immer öpis i der WG, sigs zäme öpis ungernä oder Mario Kart spiele.
*
Privatsphäre:
I ha ir WG mini eigete, chline Rückzugsorte. I erwarte auso, dass du das respektiersch und glichzytig ou dini eigeti Gränze setzisch. Aber Achtung, erwart nid we dini Türe zue isch, dass das so blibt. Aus Büsi fingi immer ä Wäg überau ine z'cho zum Gstrichelet z wärde.

I gloub das isch gnue. We du z Gfüehl hesch, du chönntsch dr userwählt WG-Mitbewohner für mi / üs si, de meud di doch bi eim vo dä Brüetsche (Alain & Sven). Aber dänk immer dra, i wirde z letzte "Miau" ha bir Entscheidig. ;-)

Miau, Miau
"Meiti"