coucou! 📮

Mir sueched eh neui Mitbewohnerin* für eusi friedlichi FINTA*-WG in Winti! Mir lebed es sehr warms und herzlichs Mitenand und fändeds schön, wenn du das ebefalls so schätze und pflege würsch! Mir sind bald nur no s zweite und drum uf de Suechi nachere dritte FINTA*-Person im Alter zwüsched 20 und 30 Jahr, wo s dritte Zimmer wür welle bezieh und ih dere WG ihres neue Dihei will finde! :-)


Willkomme heisse ih dem Dihei würed dich zwei jungi Fraue, wo sich dur die WG kenneglernt hend und so zu Fründinne hend derfe werde! Mir sind eh 27 jährigi Seklehrerin und eh 21 jährigi (baldigi) Studentin, wo's beidi sehr schätzed, es harmonischs und wohlwollends Zemmelebe z'füehre. Nebst Arbetsalltag und Studium gönd mir beidi sehr gern eusne eigene Tätigkeite und Liideschafte nah - Kreativität uslebe, musiziere, Fründ:inneschafte pflege, choche, lese, Kultur gnüsse, Konzert bsueche oder au eifach nume sie und entspanne!
Au die gmeinsami Ziit isch eus sehr wichtig. Mal ganz spontan und es anders mal plant - zemme choche, esse, en Kafi trinke, rede, zmörgele oder zemme die eigene Verpflichtige wahrneh und im stille mitenand ehchli schaffe, sind Moment, wo mir uh gnüssed und au sueched! Fründ:inne, Partner:inne und Familie belebed euses WG-Lebe immer mal wieder gern und sind au ganz herzlich willkomme! Selbstverständlich lönd mir enand aber au gnüegend Ruum und respektiered die jewilige Privatsphäre und Bedürfniss nach Rueh, Rückzug und em Ellei-Sie!


S'freiwerdende Zimmer isch zwar nöd s'grösste, es laht sich aber ganz gmüetlich und praktisch iihrichte! Mir hend defür eh sehr eh schöni, grossi und uh helli offeni Wohnchuchi! Sie isch frisch renoviert worde und drum super usgstatted. Ahschlüssend ah eusi Stube hemmer en super herzige Balkon! De geminschaftlich gnutzti Ruum + Balkon sind sicherlich s'Highlight vo eusere Wohnig und werded entsprechend au oft sehr gnutzt! Im Badzimmer hend mir en eigeni Wäschmaschine und en Tumbler, was vieles erliechtered und sicher au es grosses Plus darstellt :)


D Wohnig lliht im Innere Lind - es sehr herzigs und familiefründlichs Quartier, nur paar Minute vo de Altstadt und em Obertor entfernt. Au de Bahnhof isch ih 10-15 Minute erreichbar, mitem Velo sinds natürlich grad nomal weniger! Usserdem langed en 10 Minute Spaziergang, zum scho bim Bäumli (Goldeberg) z'sie und chöne d Ussicht über Winti z'gnüsse!


Bi Interesse derfsch dich gern melde und eus ehchli öppis über dich verzelle! Mir freued eus! 🪩