Sali zämme
Mir sueche ab 1. Dezember, oder noch Absproch, e neue*neui Mitbewohner*in bi uns in dr 4er WG. S Zimmer (12.6 m^2, 700.-/Monet) isch befristet bis Endi Juni, Juli oder August. Je nachdäm was dir am beste passt. D Wohnig isch e Katzesprung vom Schützemattpark und 1 Minute z‘Fuess vo dr ÖV Station Schützenhaus entfernt. Si isch uf 2 Stockwerk verteilt und het e wunderschöne Garte wo mir regelmässig Fründ*inne ihlade um gmietlich zämme z Grilliere oder e Bierli z trinke. 
Mir verbringe au sünst gern Zit mitenander in dr WG, öb bimene gmeinsame Z‘Nacht, eme umkämpfte Spielobe oder ere kreative Session. 
Das sin mir:
Annika (25), e glatte Socke wo Handball spielt und brueflich unserer neggste Generation s Läse und Schriebe byybringe duet. Si isch drzue no indr Usbildig um au d Kiddies mit bsundere Bedürfniss no besser z‘unterstütze.
Jascha (28), dr Annika ihre Bro, e lässige Sozi wo momentan grad au no in dr Usbildiig isch zum Heilpädagog und in dr WG au als Grizzly oder Bouldergedicht bekannt isch.
Leon (26), mit sim Charme het er scho lang dr Annika ihres Härz eroberet und momentan versuecht er sich jetz mol bi öbbis Intellektuellem und isch drum e Johr in London im Ustusch. Si Geist und sini Spure schwebe immer no in dr WG umenand und mir hoffe fest er wird das Johr au s eint oder andere mol in fester Gstalt do uftauche.
Melvin (28), au Schmellone, Schmelli (Belly), Viper, Schmenopöisli, Schmellkörper genannt, wohnt jetzt grad nonig do, trotzdem isch er sitem Start vo dr WG e grosse Fan vom Sofa als Übernachtigsglegeheit. Nacheme Johr giz endlich e Upgrade und au er übernimmt e Zimmer in unser WG (tschüssli Jascha). Unsere Señor Crispe isch de best Schlepper vo ganz Basel, immer bi allem und meh drby und wenner nümme witer weiss, gohter zu sim Akkupunktur-Guru. 
Timo (20), s'neue Bärner-Kücken in de Belche-WG, studiert Szenografie und bezeichnet sich selber als "Gumpibau" und hüpft drum vo Mur zu Mur oder vo Fels zu Fels. Ändlich isch au dr Bärnerdialäkt in unsere WG acho und mir freue uns jede Tag uf neui härzigi Wörter. 
Was natürli grossartig an dr WG isch, isch dr Fakt, dass die beide Wohnige obedrah vo guete Fründ*inne bsetzt wärde. D Polizistin Tabea hets nit gärn wenn me ohni Velohelm umefahrt. Ihre Fründ, dr Spontänu isch sit neuem Bauherr und drum nüm ganz sim Spitzname entsprechen. Ganz obe wohnt unsere Huusmeister, Sheriff und Träumer in Personalunion, alias dr Fabian. Er duet gärn s Stäägehuus suuge. Sperrguet isch hingege nit sini Spezialität. Sini besseri Hälfti isch d Jenny, au d Piste, Beton oder Huusmami gnennt. E obe mit dr Piste kah sehr lang ahduure aber isch defür umso spassiger. Vorallem mit de beide ganz obe verbringe mir viel Zit. 
Wenn du dänksch, du passisch in unseri Belchebandi, würde mir uns über e kleini Stellignahm dineresiets freue. Gern kasch du die an folgendi Mailadrässe schicke: belchen11wg@gmail.com